महाराष्ट्रातील पुरोगामी विचारवंत यशवंत सुमंत यांचे शनिवार दि. ११ एप्रिल २०१५ रोजी निधन झाले. त्यांच्या निधनाने त्यांच्या कुटुंबासह महाराष्ट्रातील सामाजिक, शैक्षणिक, वैचारिक आणि साहित्य क्षेत्राचे मोठे नुकसान झाले. राज्यशास्त्राचे प्राध्यापक व विभागप्रमुख ही जरी प्राधान्याने ओळख असली तरी त्यांची नाळ सामाजिक शास्त्रे, साहित्य, वेगवेगळ्या संघटना, चळवळी, वैचारिक व्यासपीठे आणि संस्थाशी जुळलेली होती. आधुनिक भारतीय राजकीय विचार, एकोणिसाव्या व विसाव्या शतकातील धर्मचिंतन, महाराष्ट्रातील सामाजिक, आर्थिक वास्तव व राजकीय विचार आधुनिक राजकीय विचारप्रणाली राजकीय सिद्धांत आणि तुलनात्मक राज्यशास्त्र हे त्यांच्या चिंतनाचे प्रमुख विषय होते. महात्मा फुले, महात्मा गांधी, बाबासाहेब आंबेडकर, मार्क्स, विनोबा, आचार्य जावडेकर व वि. रा. शिंदे यांचे विचार ते मानत होते. समाजव्यवस्था शोषणमुक्त असावी हा त्यांचा विशेष आग्रह असायचा, म्हणजेच जातिमुक्त, वर्गविरहीत आणि लिंगभावात्मक आधारित भेदभावमुक्त व्यवस्था असावी असे त्यांचे मत होते. कोणत्याही प्रश्नाकडे तुकड्यातुकड्यात न बघता समग्र पद्धतीने बघण्याची त्यांची दृष्टी होती. सरांच्या सहवासात विद्यार्थी म्हणून आलेला सरांशी संपर्क, शैक्षणिक क्षेत्रातील योगदान आणि सार्वजनिक जीवनाचा जो अनुभव आला, त्यातील निवडक आठवणी व कार्य सांगता येईल.